新年新希望

豬年就快到，終於可以同狗年講拜拜，由於狗年本命年衝到亂晒籠，豬年總算有個希望可以否極泰來，衰氣一掃光。
只不過買了M額長毛本運程書，竟然話狗年人會「延續上年」的走勢，直至下半年先有好轉…………………………
仲話最好去多D旅行，放自己一個 悠長假期 咁話………………………………
真係灰到震，好彩還有 每年會為我指點迷津的羅大師 開解，話呢類運程書只講最大路野，邊有可能某個年份的人會同樣衰運或全部好彩的。
不過呢種講法聽落雖則好似有理，但又未必得晒。皆因佛家有所謂「共業」，有D大事有D趨勢又的而且確會影響同一代的人，
80果年的韓國人與及89六四的中國人，如果咁生而為學生的話，那年的運程預測書究竟係點寫？有無風水大師寫明大家包散？？
我自己畢業果兩三年的人也肯定運勢好不了那裡去。蒲出來捱幾年辛苦買了層樓置個家，就校定鬧鐘都無咁準時，撞正八萬五大有大賠小有小輸。事業最初好幾年的積蓄，轉眼蒸發掉。就算好彩無買樓，一樣死係股市中，我地一代唔係死樓就死股。自己就認識某舊同學，人生如戲，中過六合彩頭獎，風光過後，結果還是一樣，幾年下來打回原形。
有時鋪天巨浪蓆捲，大勢「共業」底下，又有幾個人可以能置身事外？？
人越老果然越迷信………
於是 年廿九望住天光時分，Make個Wish，

希望公司可以繼續，豬年生生性性有錢賺……………

希望來年可以出外走走，打個白鴿轉，轉個運再殺過。想去莫斯科，英美加也不錯。不過聽聞全地球村都吹起黃禍風，得有心理準備遭不白眼……

希望香港少點人，家下實在人太多，出街好多時三唔識七都「擦」得出火花，過分擠逼的城市，會讓人多少感染神經質，行為變變態態，互相傾軋。

希望香港繁體書店頂下去，咪再執笠，希望那些賣簡體的咪再「扮傻」賣老翻侵權書，尤其是賣10幾皮果D日本漫畫，你賺果幾皮一本邊夠喉？不如改行開酒樓唔出糧執笠走佬，或當中介人鋪橋搭路幫大陸孕婦來港生仔，花阿公花全港納稅人錢咪搵仲多？為一個幾皮搞死繁體出版，再咁落去真係搵阿水出繁體版都得咯，做少D衰野正正經經當幫忙啦喂。

…………………………………………睇黎，都係希望自己少點火才是最緊要。